УП ЖКГ прыспешвае вясну
Зіма паціху здае пазіцыі, а УП ЖКГ паскарае прыход вясны. Нягледзячы на тое, што слупок тэрмометра падняўся вышэй за нуль, аб’ёмы работ не толькі не зменшыліся, а наадварот. Слізкія тратуары, лужы, снежныя дахі і гурбы снегу – вось галоўныя ворагі, з якімі штодзённа змагаюцца камунальныя службы. Як арганізавана ўборка, дзе ў горадзе чысцей за ўсё і чаму нельга ачысціць усё і адразу – у рэпартажы «Герой працы».
Раніца пачынаецца са світаннем
Пакуль большасць жыхароў райцэнтра яшчэ даглядае апошнія сны, на вуліцах Шуміліна ўжо гучыць рык рухавікоў. Трактары і грэйдары пачынаюць сваю работу задоўга да таго, як пачнецца гадзіна пік. Галоўная задача – расчысціць асноўныя дарогі і тратуары, каб транспарт і людзі без праблем дабраліся да работы.
Галоўны інжынер УП ЖКГ Максім Русецкі кантралюе сітуацыю.
– Штодзень у нас задзейнічана каля 10 адзінак тэхнікі, – расказвае Максім Алегавіч. – Гэта і трактары з адваламі, і пагрузчыкі, і тэхніка для вывазу снегу. Аб’ёмы работ з прыходам адлігі засталіся вялікімі: мы працягваем расчышчаць снег на дарогах і тратуарах на вуліцах і прыдамавых тэрыторыях. Асаблівая ўвага – грунтавым дарогам, якія без апрацоўкі хутка ператвараюцца ў ледзяны каток. Туды мы актыўна ўносім пясчана-саляную сумесь.
Куды знікаюць снежныя гурбы?
Адна з самых працаёмкіх задач – вываз снегу з гарадскіх вуліц. Калі раней снег проста раставаў, то цяпер яго трэба збіраць і вывозіць, каб расталая вада не затапіла праезную частку і тратуары.– Вывозім снег штодзённа, – працягвае галоўны інжынер. – Асабліва старанна чысцім пераходы, цэнтральныя вуліцы. На жаль, адначасовы вываз адбываецца не паўсюдна. Спачатку – самыя ажыўленыя ўчасткі. Прыбіраем на дварах, стараемся заязджаць у кожны двор, але фізічна ўсюды ачысціць проста немагчыма за адзін дзень. Трэба разумець: Шуміліна – не маленькая вёсачка, а вулічная сетка даволі разгалінаваная.
Тэхніка і людзі супраць снегу
УП ЖКГ працуе ў поўным складзе. Акрамя вадзіцеляў і трактарыстаў, на вуліцы выходзяць да 12 рабочых. Уручную яны дапрацоўваюць тое, што не можа зрабіць тэхніка: прачышчаюць уваходы ў пад’езды, пасыпаюць сумесі ў вузкіх месцах, убіраюць у цяжкадаступных.
– Зіма была надта снежнай, – дадае Максім Русецкі. – Мы гатовы да вясны: сочым за вадасцёкамі, каб вада не застойвалася на дарогах. Самае складанае – калі ноччу падмарожвае, а днём усё растае. Утвараецца лёд, і яго трэба пасыпаць зноў і зноў.
Планы на бліжэйшыя дні
– Мы працягваем працаваць па графіку, – заўважыў Максім Русецкі. – Усе сілы будуць накіраваны на тое, каб раніцай шумілінцы прачнуліся і ўбачылі, што горад гатовы да новага дня без ледзянога катка.
ДАВЕДКА «ГП»
За апошні тыдзень з вуліц Шуміліна вывезена 300 кубаметраў снегу. На апрацоўку дарог выкарыстана 40 тон пясчана-саляной сумесі.
Аляксандр ШЭДЗЬКО.
