«Жанчына – крыніца жыцця і дабрыні»
У Віцебску ўшанавалі лепшых жанчын рэгіёна
Канцэртная зала «Віцебск» 6 сакавіка была падобная на кветкавую паляну –столькі тут сабралася прыгажосці, усмешак і святочнага настрою. Сорак жанчын з розных куткоў Віцебшчыны прыехалі, каб пачуць словы падзякі. Сорак гісторый поспеху, сорак лёсаў, у якіх перапляліся прафесійныя вышыні і простае жаночае шчасце.
«Вы – крыніца жыцця і дабрыні»
Гэтыя словы старшыні Віцебскага абласнога Савета дэпутатаў Дзмітрыя Дзямідава былі зваротам да пераможцаў абласнога этапа конкурсу «Жанчына года -2025». Да тых, хто штодзень вядзе за сабой калектывы, хто трымае на плячах гаспадарку, чые сэрцы аддадзены дзецям.– Вы з’яўляецеся крыніцай жыцця, цяпла і дабрыні. Усе нашы поспехі абумоўлены вашай падтрымкай, – сказаў Дзмітрый Дзямідаў. – Вельмі хочацца, каб клопат і каханне, якім вы атачаеце сваіх родных і блізкіх, у шмат разоў вярталася і вам.
Гонар Шумілінскага раёна
Сярод тых, каго ўзнагароджвалі, – нашы зямлячкі. Аксана Талстая, начальнік аддзела па адукацыі райвыканкама, стала лаўрэатам у намінацыі «Паспяховы кіраўнік». За гэтай намінацыяй – штодзённая праца, адказнасць і ўменне весці за сабой людзей. А Святлана Балашэўская, старэйшына вёскі Саладухі Пушчавыя Светласельскага сельсавета, атрымала заслужанае прызнанне ў намінацыі «Гаспадыня вёскі». Тыя, хто ведае Святлану, не здзіўляюцца: яе энергіі і гаспадарлівасці можна толькі пазайздросціць, а вёска для яе – не проста месца жыхарства, а родны дом, пра які яна клапоціцца, як пра самы дарагі скарб.
«Няхай ваша жыццё будзе напоўнена яркімі фарбамі!»
– Сёння ў нас ёсць магчымасць сказаць словы падзякі актывістам нашага руху, якія сваім прыкладам, працай зараджаюць моладзь. Год беларускай жанчыны – не толькі мерапрыемствы, акцыі і праекты, але яшчэ і доля адказнасці, якая легла на нашу арганізацыю. Мы павінны быць больш чулымі і ўважлівымі. Мы з вамі і псіхолагі, і лекары, і паэты, і творцы, і проста тыя жанчыны, місія якіх – дапамагаць людзям. Няхай ваша жыццё будзе напоўнена яркімі фарбамі! – пажадала ўдзельнікам свята старшыня Віцебскай абласной арганізацыі Беларускага саюза жанчын Марына Навіцкая.
А потым быў канцэрт – падарунак для тых, хто сам штодзень дорыць свету цеплыню. І здавалася, што ў гэты вечар кожная жанчына ў зале адчувала сябе каралевай. І яна гэтага вартая.
СЛОВА – ЛАЎРЭАТУ АКСАНЕ ТАЛСТОЙ:
– Адразу скажу, што гэта ўзнагарода не мая, не асабістая. Гэта ўзнагарода кожнага, хто працуе ў сістэме адукацыі раёна. Таму хочацца сказаць дзякуй усім кіраўнікам устаноў адукацыі, кожнаму педагогу і тэхработніку. Усе мы разам робім агульную справу і імкнемся яе рабіць як мага лепш. З упэўненасцю магу сказаць, што мы – каманда аднадумцаў і можам рэалізоўваць самыя смелыя ідэі.
Аляксандр ШЭДЗЬКО.
