Пра здарэнні ў раёне расказаў намеснік начальніка РАУС Павел Трафімаў.
За мінулы тыдзень у аператыўна-дзяжурную службу РАУС паступілі 44 заявы і паведамленні грамадзян.
Выяўлена 12 адміністрацыйных правапарушэнняў (па тры – за дамашняе насілле і незахаванне патрабаванняў прэвентыўнага нагляду, па два – за знаходжанне ў стане алкагольнага ап’янення ў грамадскіх месцах і нявыхад абавязаных асоб на работу).
Зарэгістраваны 3 ДТЗ (без пацярпелых, у двух выпадках віноўнікі і пацярпелыя сутыкненняў разышліся па еўрапратаколах).
Праведзена адпрацоўка 24 асоб, якія стаяць на прафілактычных уліках за правапарушэнне ў быце і за злоўжыванне спіртнымі напіткамі.
Труп у Мікіцісе
17 студзеня ў міліцыю патэлефанаваў жыхар аг. Мікіціха і расказаў, што падчас выгулу сабакі каля чыгункі, на могілках, знайшоў труп мужчыны. Супрацоўнікі РАУС выехалі на месца здарэння і ўбачылі скалелы труп мужчыны, твар якога быў аб’едзены жывёламі. Прызначана генетычная экспертыза. Падрабязнасці здарэння высвятляюцца.
Разварот
15 студзеня жыхар Верхнядзвінскага раёна, кіруючы «Сітраенам» на аўтадарозе Віцебск-Полацк, пры развароце не ўступіў дарогу аўтамабілю «Лада-Ларгус», які рухаўся ў спадарожным накірунку. У выніку аўтамабілі сутыкнуліся. Абодвум транспартным сродкам патрабуецца рамонт. На віноўніка ДТЗ складзены адміністрацыйны пратакол, пагражае штраф ад 5 да 20 БВ з пазбаўленнем права кіраваць транспартнымі сродкамі на два гады або без пазбаўлення.
Футра
Жыхарка райцэнтра, якая знаходзіцца ў водпуску па доглядзе за дзіцяці да трох гадоў, захацела купіць футра. Звярнулася ў інтэрнэт-магазін у Інстаграм, бо знайшла там тавар па прымальнай цане – за 620 рублёў. Зрабіла папярэднюю аплату і чакала, калі дашлюць пакупку. Праз некаторы час ад прадстаўнікоў «інтэрнэт-магазіна» прыйшло паведамленне: «Футра можаш не чакаць», а інтэрнэт-пляцоўка была заблакіравана. Жанчына звярнулася ў міліцыю. Па дадзеным факце ўзбуджана крымінальная справа, махлярам пагражае абмежаванне волі да трох гадоў або пазбаўленне волі на той жа тэрмін.
Людміла ЗУЙКОВА.
