9 лістапада стартавала спартакіяда сярод работнікаў арганізацый і прадпрыемстваў Шумілінскага раёна на прызы раённага аб’яднання прафсаюзаў. На спартыўных пляцоўках змагаюцца 18 каманд з 22 арганізацый.
У суботу ў СДЮШАР прайшло ўрачыстае адкрыццё спартакіяды. І гэта было сапраўднае свята спорту. Усе 18 каманд у чаканні яркай і бескампраміснай барацьбы. Перад пачаткам стартаў усе роўныя: і пастаянныя ўдзельнікі спартакіяды, і навічкі. Дарэчы, навічкоў сёлета шмат – гэта каманды сярэдніх школ раёна і Полацкага малочнага камбіната. На жаль, не выставіла сваю каманду Шу-мілінская ПМК-70, якая раней прымала актыўны ўдзел.
Спартакіяда – гэта старты па 10 відах спорту (дартс, стральба з пнеўматычнай зброі, настольны тэніс, футзала, баскетбол, валейбол, шашкі, бадмінтон, гіравы спорт і перацягванне каната). Асабліва цікавымі павінны быць спаборніцтвы па баскетболе, турніры па якім у нас ужо даўно не праводзіліся. На спартыўныя пляцоўкі (спартыўныя залы фізкультурна-аздараўленчага цэнтра, СДЮШАР, СШ №1) удзельнікі будуць выходзіць на працягу трох тыдняў.
Каманды на адкрыцці віталі намеснік старшыні райвыканкама Ірына Шалахава і старшыня раённага аб’яднання прафсаюзаў Наталля Хамаганава.
У першы дзень спартакіяды на старт выйшлі футбалісты. 23 лістапада ў спартыўнай зале ФАЦ пройдуць гульні за прызавыя месцы па футзале.
У першы дзень спартакіяды вызначыліся пераможцы на дартсе і стральбе з пнеўматычнай зброі.
Дартс. Перамога ў кіданні дроцікаў у Яны Радзівоненкавай (Раён газазабеспячэнні і РАУС) і Яўгена Калеснікава (ЦРБ), другое месца ў Анастасіі Гаевай (СШ №2 і Башнёўская БШ) і Ігара Ігнаценкава (Кардонская СШ), трэцяе – у Людмілы Адаменка (цэнтр па забеспячэнні дзейнасці бюджэтных арганізацый), Паўла Загацкага (райвыканкам і СДЮШАР) і Сяргея Авяр’янава (цэнтр па забеспячэнні дзейнасці бюджэтных арганізацый).
У камандным заліку першае месца ў каманды райвыканкама і СДЮШАР, другое – у зборнай Раёна газазабеспячэння і РАУС, трэцяе – у зборнай РАНС і ўчастка электрасувязі.
Стральба з пнеўматычнай зброі. Першае месца – Арына Кучынская (РАНС і ўчастак электрасувязі), Аляксандр Шумінскі (Раён газазабеспячэння і РАУС) і Сяргей Авяр’янаў (цэнтр па забеспячэнні дзейнасці бюджэтных арганізацый), другое – Наталля Болдыш (Обальская СШ), трэцяе – Алена Кляшчонак і Аляксей Шпакаў (абодва з УП ЖКГ).
Камандны залік: першае месца – УП ЖКГ, другое – Шумілінскі лясгас, трэцяе – цэнтр па забеспячэнні дзейнасці бюджэтных арганізацый.
У агульным заліку спартакіяды пасля двух відаў лідарства захапілі каманды «Райвыканкам-СДЮШАР» і «Раён газазабеспячэння-РАУС».
Аляксандр ШЭДЗЬКО.
