У «Лаўжанскім» чысцяць зерне на насенне
Хаця яшчэ далёка да вясенняй сяўбы, але ў гаспадарках раёна ўжо да яе рыхтуюцца – поўным ходам ідзе ачыстка насення.
На днях мы пабывалі на зернесушыльным комплексе СУП «Лаўжанскае». Неспрыяльнае надвор’е на вуліцы (імжыў дождж) не перашкаджае рабоце на зернеачышчальнай машыне ”Петкус Гігант”, якая ўстаноўлена ў арачніку. Родныя браты Яўген і Вячаслаў Корбаны ў ліпені-жніўні рупіліся тут аператарамі зернесушыльнага комплексу, а цяпер вось таксама працуюць з зернем, але ўжо на сарціроўцы. «Работа для мяне не новая, – кажа Яўген Корбан. – Паўтара дзясятка гадоў на ачыстцы. Галоўнае, каб тэхніка працавала без збояў. Насенне па шнэку паступае ў бункер, пасля ачышчаецца ад пылу і лёгкіх прымесяў, прасейваецца на рэшатах для выдалення пашкоджанага зерня. Ачышчанае зерне ўпакоўваецца ў мяшкі. За дзень ачышчаем 7-8 тон».
«Зараз ідзе ачыстка аўсу гатунку “фрыстайл”, наперадзе – яравая пшаніца, – расказала загадчыца склада Таццяна Купрыянава. – Праз кожныя ачышчаныя 30 тон да нас прыязджаюць работнікі райінспекцыі па насенняводстве, каранціне і ахове раслін і адбіраюць зерне на праверку.
Праверылі ўжо 130 тон – зерне адпавядае патрэбным параметрам па ўсходжасці і вільготнасці. Засталося давесці да патрэбных кандыцый яшчэ 80 тон, бо па плане гаспадарцы трэба нарыхтаваць для вясенняй сяўбы 210 тон насення».
Ларыса КІСЯЛЁВА.
