Лета пад кантролем
На тэрыторыі Обальскага сельсавета прайшоў чарговы міжведамасны рэйд “Сям’я без насілля”, удзельнікі якога наведалі сем’і, якія знаходзяцца на розных відах прафілактычнага ўліку.
Галоўнае пытанне, якое цікавіла, – гатоўнасць сямей да летніх канікулаў, арганізацыя дзіцячай занятасці і адпачынку. Як высветлілася, адны паедуць аздараўляцца ў лагеры, другія – да бабуль у вёску, падлеткі плануюць уладкавацца на работу.
Строга кантралююць удзельнікі рэйду стан бацькоў. Прыемна было адзначыць, што ўсе бацькі былі цвярозыя. Дарослыя разумеюць, што любое парушэнне – гэта крок да развітання з дзіцём.
Тым не менш, сітуацыя ў некаторых сем’ях застаецца складанай. Адну з сямей у хуткім часе могуць пазбавіць бацькоўскіх правоў. Аднак камісія не ўбачыла ні слёз, ні просьбаў даць апошні шанс, а простую абыякавасць.
Зусім іншыя эмоцыі чакалі ўдзельнікаў рэйду ў дамах, дзе дзеці нядаўна вярнуліся з прытулка. «Гэтага больш не паўторыцца», – запэўнівалі яны членаў камісіі. Страх страціць дзяцей прымусіў іх перагледзець сваё жыццё.
Суб’екты прафілактыкі працягваюць кантраляваць сітуацыю ў сем’ях, бо бяспека дзяцей у летні перыяд – зона асаблівай увагі і адказнасці.
Аляксандр ШЭДЗЬКО.
