Флікер не для інспектара, а для тых, хто хоча жыць
Восень – цёмны час года, калі на дарогах становіцца вельмі небяспечна. Вадзіцелі, як правіла, заўважаюць пешахода ў цёмным адзенні ўсяго за 25-30 метраў, і гэтага не заўсёды хапае, каб своечасова затармазіць. Таму супрацоўнікі ДАІ заклікаюць пешаходаў пазначаць сябе святловяртальнымі элементамі. Найбольш частыя пытанні наконт флікераў мы папрасілі пракаменціраваць старшага дзяржаўтаінспектара ДАІ РАУС Віктара Бурлакова.
? Якога колеру флікер лепш купляць?
– Белага, лімоннага або жоўтага – гэтыя колеры лепш бачныя ў цемры пры святле фар. Вялікая плошча святловяртальнага элемента павялічвае заўважнасць чалавека. У правілах дарожнага руху колькасць не прапісана. Аднак дзеля бяспекі рэкамендуецца насіць некалькі флікераў, на розных участках адзення.
? Дзе насіць?
– На куртках, штанах, абутку, шапках, сумках, рукзаках, а таксама на калясках, самакатах, санках, веласіпедах, роліках, а бранзалеты і павязкі – на руках.
? Калі флікер абавязковы?
– Пры руху па краі праезнай часткі ў цёмны час сутак. Пры пераходзе праезнай часткі па-за ўстаноўленых пешаходных пераходаў (як на неасветленых, так і на асветленых участках).
? Які штраф прадугледжаны для тых, каго не бачна ў цемры на дарозе?
– За адсутнасць флікера чакае штраф ад 1 да 3 БВ. Калі пешаход пры гэтым у нецвярозым выглядзе – штраф ад 3 да 5 БВ.
Супрацоўнікі ДАІ нагадваюць: бяспека на дарогах пачынаецца з простых правіл, якія трэба захоўваць штодзённа. Памятайце, што флікеры прыдуманы не для інспектара, яны прызначаны ўратаваць ваша жыццё.
Лідзія РУМЯНЦАВА.
