Маці з вялікім сэрцам
У Дзень маці актывісты раённага аддзялення ГА «Беларускі саюз жанчын» разам з аддзелам па адукацыі райвыканкама павіншавалі Ірыну Загвоздаву, маці-выхавальніка дома сямейнага тыпу, з самым светлым святам.
Для Ірыны Аляксандраўны гучалі самыя шчырыя словы падзякі і прызнання. Яе штодзённая праца – гэта не проста выкананне абавязкаў, а сапраўднае служэнне дзецям, якім асабліва патрэбныя любоў, клопат і ўвага. Дом сямейнага тыпу стаў для іх родным домам.
– Няхай у вас заўсёды будуць цяпло і ўтульнасць, дабрыня і шчырасць, – пажадала старшыня раённай арганізацыі «Беларускага саюза жанчын» Наталля Крыўко.
Падчас сустрэчы прагучала шмат добрых пажаданняў здароўя, сямейнага дабрабыту, спакою і радасці ад кожнага дня, праведзенага з дзецьмі. Акцыя-віншаванне завяршылася цёплай сямейнай гутаркай за кубкам духмянай гарбаты.
Аляксандр ШЭДЗЬКО.
