Падвесці вынікі, вызначыць планы на будучае
Ва ўсіх сельскагаспадарчых арганізацыях раёна праходзяць балансавыя камісіі, на якіх трымаюць справаздачы кіраўнікі і галоўныя спецыялісты гаспадаркі – яны расказваюць аб мінулагодніх здабытках і планах на сёлетні год. На мінулым тыдні такая камісія прайшла ў ААТ “Лаўжанскае”, у яе рабоце прынялі ўдзел старшыня райвыканкама А. І. Снараў, начальнік райсельгасхарчу В. Ц. Мянькоў, спецыялісты ўпраўлення сельскай гаспадаркі і харчавання райвыканкама.
Па выніках работы гаспадаркі за мінулы год слова трымала галоўны эканаміст ААТ “Лаўжанскае” Н. А. Рыбчанка. Агучаныя лічбы вытворчых паказчыкаў не радавалі. Цешыла толькі адно: рэалізацыя малака склала 2247 тон (на 4% больш, чым у 2014 годзе), на ўзроўні застаўся і валавы надой. Тым не менш, спецыялістаў райсельгасхарчу трывожыць сітуацыя па якасці малака: за 2015 год з “Лаўжанскага” ў Шумілінскі вытворчы цэх ААТ “Малако” здалі толькі 13,2% гатунку “экстра”. У той жа час “Прыдзвінскі” здаў такога малака 68,2%. Страты з-за нізкай якасці малака ў “Лаўжанскага” за мінулы год склалі 183 мільёны, з-за нізкай таварнасці – крыху больш як чатырыста мільёнаў рублёў, падлічыла эканамічная служба.
Як працаваць так, каб выйсці ў перадавікі па колькасці і якасці малака? Заатэхнікі, брыгадзіры фермаў прапаноўвалі розныя падыходы да гэтай праблемы. А ўвогуле ўсе пытанні зводзіліся да добрага абслугоўвання даільных залаў на фермах Рашэтнікі і Цаўі, якія калісьці былі самымі перадавымі ў раёне, да якаснага кармлення і догляду. Першы намеснік начальніка райсельгасхарчу А. М. Пытко прапанаваў на ферме Мясаедава стварыць групу раздою: там і ўмовы прымальныя, і работнікі адказныя. А малако – гэта рэальныя грошы, з якіх гаспадарка можа не толькі жыць, але пры добрых надоях і мець нядрэнны прыбытак, адзначыў Аляксей Мікалаевіч.
Дырэктар райплемстанцыі А. А. Казьмін звярнуў асаблівую ўвагу на кантроль за асемяненнем кароў і цёлак. Каб не атрымалася так, як летась, што выхад цялят на сто кароў у “Лаўжанскім” склаў 54. Гэта вельмі мала. Спецыялісты райсельгасхарчу ўказалі на тое, што ў гаспадарцы несвоечасова выяўляюцца каровы ў ахвоце, ёсць праблемы з рэктальным даследаваннем – вызначэннем цельнасці. Кіраўнік раёна А. І. Снараў адзначыў, што больш вопытным калегам з раённых службаў трэба дапамагаць у гэтым накірунку маладым спецыялістам – ветурачу і заатэхніку.
Пра планы на веснавую сяўбу расказаў дырэктар гаспадаркі А. А. Кавальчык. Акрамя пшаніцы, аўсу і зернебабовых, у гаспадарцы мяркуюць засеяць 1239 га аднагадовых траў, якія пойдуць на вытворчасць кармоў. Спецыялісты гаспадаркі настроены на сур’ёзную работу: нарыхтаваць кармоў столькі, каб і самім хапіла, і можна было прадаць лішкі.
Не за гарамі пасяўная, таму сённяшні клопат інжынернай службы і механізатараў ААТ “Лаўжанскае” – падрыхтоўка тэхнікі да пасяўной. Яе ў гаспадарцы хапае, але ж не ўся адрамантаваная. На запчасткі патрэбны грошы. Кіраўнік раёна парэкамендаваў гаспадарцы прадаць у райспажыўтаварыства пяцьдзясят тон пшаніцы. На выручаныя грошы можна будзе купіць патрэбныя запчасткі. Дарэчы, лемяшы заказваюць і на Обальскім керамічным заводзе – там робяць не горш, чым у Віцебску.
Кіраўнік раёна звярнуў асаблівую ўвагу на тое, што на мехдвары ў ААТ “Лаўжанскае”, які знаходзіцца ля бойкай трасы, павінен быць ідэальны парадак. Інжынернай службе было ўказана ў тэрміновым парадку паставіць усю тэхніку на лінейку гатоўнасці.
Ларыса ЗАЙЦАВА.
Надрукавана ў №15 ад 23.02.2016 г.
