Хто блін не з’еў, той вясну не сустрэў
У суботу 25 лютага ў райцэнтры прайшлі народныя гулянні «Масленіца ў варот – усіх вясёлае свята чакае!».
Масленіца – адно са старажытных святаў, якое захавала папулярнасць і шырока адзначаецца ў нашы дні. Масленічныя святкаванні пачынаюцца за тыдзень да вялікага посту. У народзе Масленіца спрадвечна лічылася самым сытным святам. У гэты дзень адбываецца развітанне з зімой і сустрэча вясны, якая нясе ажыўленне прыроды і сонечнае цяпло.
На народных гуляннях ў Шуміліне было багата галоўных атрыбутаў масленічнага тыдня – бліноў. 14 інтэрактыўных пляцовак «З пылу з жару!» прапаноўвалі бліны са смятанай і тварагом, з мёдам і варэннем, смажанінай і грыбамі. Нялёгка прыйшлося журы вызначаць лепшых, тым не менш пераможцы былі вызначаны:
у намінацыі «Яркая прэзентацыя інтэрактыўнай пляцоўкі» – Шумілінская цэнтральная раённая бальніца;
у намінацыі «Ой, бліны, мае бліны» – Цэнтр па забеспячэнні дзейнасці бюджэтных арганізацый;
у намінацыі «Самая арыгінальная выпечка бліноў» – раённы ўчастак па апрацоўцы пошты Віцебскага філіяла РУП «Белпошта»;
у намінацыі «Усім блінам блін» – «Сярэдняя школа №2 імя А. І. Дубасарскага г.п. Шуміліна».
Народнымі песнямі, танцамі, гульнямі і забавамі сустракалі вясну шумілінцы. А якая ж Масленіца без слупа? Трэба было бачыць, як дзятва спрабавала залезці на яго, але слуп скарыўся самым моцным і спрытным. І такіх аказалася 10 чалавек.
Кульмінацыя свята – спальванне пудзіла Зімы. Лічыцца, што гэты рытуал сімвалізуе не толькі провады зімы, але і тое, што ў вогнішчы гараць нашы няшчасці, няўдачы і іншы негатыў, накоплены за зіму.
– Бывай, зіма! Прывітанне, вясна!
Алесь САКАЛОЎ.
