ТЭРЫТОРЫЯ ПАЖАРНАЙ БЯСПЕКІ: УРАДЖАЙ ПАД АХОВАЙ
Сухая трава і гарачы метал – НЕБЯСПЕЧНЫ ДУЭТ
Уборка ўраджаю – самы напружаны перыяд у сельскай гаспадарцы, і менавіта ў гэты час рызыка ўзнікнення пажараў найбольш высокая. Пашкоджаныя камбайны, страчанае зерне, зламанае абсталяванне – усё гэта наступствы агню, які часта ўзнікае з-за банальных парушэнняў.
«Найчасцей камбайны гараць з-за кароткага замыкання, разрыву гідрашлангаў, траплення масла на гарачыя часткі рухавіка, – зазначае начальнік РАНС Дзмітрый Гушчын. – Калі тэхніка выходзіць у поле з неадрэгуляванымі сістэмамі, яна хутка пакрываецца гаручым пылам – і адна іскра можа ператварыць машыну ў полымя. Нярэдка камбайны працуюць без вогнетушыцеляў, што катэгарычна забаронена! Пажарная небяспека высокая і на сушыльных комплексах: перавышэнне тэмпературы, парушэнне рэгламенту – і зерне можа загарэцца ўнутры сушылкі, пашкодзіўшы дарагое абсталяванне. Хочацца нагадаць: захаванне правілаў пажарнай бяспекі – абавязак кожнага, хто працуе на ўборцы».
Асноўныя патрабаванні бяспекі падчас уборкі
Адказныя за бяспеку павінны быць прызначаны да пачатку ўборкі.
Інструктаж і навучанне – абавязковыя для ўсіх, хто задзейнічаны на ўборцы, сушцы і захоўванні зерня.
Іскрагасільнікі павінны быць на ўсіх трактарах, камбайнах і машынах.
Ачыстка тэхнікі – 2-3 разы за змену, без выкарыстання адкрытага агню.
Своечасовае абслугоўванне: прыбіраць наматаную салому, пыл, сачыць за гідраўлікай і электрыкай.
Забарона на тарфяніках – ніякіх рамонтных і запраўных пунктаў.
Пажарнае дзяжурства – абавязкова на месцах уборкі.
Суправаджэнне тэхнікі пры перамяшчэнні – пажарная або прыстасаваная машына павінна быць побач.
Вогнетушыцелі: не менш за два ВП-8 на кожным камбайне.
Як дзейнічаць, калі ўзнік пажар?
Механізатар павінен:
неадкладна паведаміць пра здарэнне ў службу ратавання па тэлефонах 101 ці 112;
падаць сігнал пажарнай тэхніцы ці прыстасаванай для тушэння пажару тэхніцы (пры яе дзяжурстве на месцы ўборкі ўраджаю);
пачаць тушэнне наяўнымі сродкамі;
вывезці камбайн з хлебнага масіву;
абмежаваць распаўсюджванне агню – абараць зону гарэння і паставіць людзей для тушэння.
